Brownout gikabalak-an

CEBU, Philippines - Gikabalak-an nga ang mga Sugboanon makasinati og sub-sob nga brownout pipila ka adlaw gikan karon kun ang mga nangaguba nga planta sa elektrisidad dili dayon mamaayo.

Gani ang kadagkoan sa Department of Energy (DOE) ingon man ang Visayan Electric Company (VECO) mipasidaan na sa publiko nga hayan mopatuman sila og rotational brown out kun magdugay ang problema sa kanihit sa suplay sa kuryente.

Matud ni DOE regional director Antonio Labios nga nag-shut down ang usa sa mga unit sa planta sa Cebu Energy Development Corporation (CEDC) nga nagbase sa Barangay Sangi, Toledo kaniadto pa’ng Mayo 16 human nga adunay leak ang linya niini. Nasayran nga ang maong planta mo-suplay og kapin sa 200 megawatts nga kuryente nga maoy naghatag og suplay sa dakbayan sa Toledo ug sa kasikbit nga kalungsoran sama sa Aloguinsan, Pinamungajan, Balamban, Asturias ug Tuburan.

Dugang ni Labios nga adunay tulo ka unit ang planta sa CEDC diin sa pagkaguba sa usa ka unit nawad-an og reserve nga suplay sa kuryente.

Sa pagkakaron wala pa hinuo’y gipatuman nga rotational brownout sa siyudad. Gawas sa planta sa Toledo naguba usab ang pipila ka planta sa Panay Development Corporation ug ang Leyte Geothermal plant. Naapektohan usab ang reserve nga suplay sa kuryente sa rehiyon nga moabot sa 200 ngadto sa 300 mega watts sa pagkaguba sa maong mga planta.  (/RUB)(BANAT NEWS)