Babaye gidunggab sulod sa pansayan tungod sa selos

CEBU, Philippines - Ang kahera nga babaye sa usa ka balay-patigayon sa Barangay Guizo, Mandaue gidunggab sa usa ka call center agent sulod sa pansayan tungod kay nagselos nga ang iyang kapuyo adunay relasyon ug ang biktima.

Gamay ra nga samad ang naangkon sa 21-anyos nga si Eva dela Cruz kay nakabantay siya nga misunod kaniya si Mary Grace Chua ug midunggab gamit ang usa ka gunting.

Si Dela Cruz dali kaayo nga nakasinggit ug nangayo’g tabang samtang padayon nga misagang-sagang sa pag-atake ni Chua kaniya mao nga nangabot ang mga  guwardiya.

Ang mga guwardiya na maoy midakop ni Chua, 27, lumad nga taga Northern Samar ug temporaryo nga nagpuyo sa Barangay Lahug, dakbayan sa Sugbo.

Matud ni PO1 Jerome Lendio nga si Dela Cruz misulod sa pansayan aron pagtuman sa sugo sa lawas apan gisundan siya ni Chua nga naghambin diay og kasuko kaniya. Nasayran nga si Chua nagselos ni Dela Cruz kay ang iyang kapuyo nadunggan niya nga may relasyon ug ang batan-on nga kahera sa tindahan.  

Nasakmit sa guwardiya gikan ni Chua ang gunting nga gigamit niya pagdunggab ni Dela Cruz ug nakuha usab ang packaging tape nga gisulod sa paper bag nga iyang dala. Wala dayon mahibaw-i kun unsaon ni Chua ang packaging tape. Ang kahera nga nakaangkon lang og mga samad sa iyang lawas ug duha sa bukton dali nga gihatod sa Mandaue City Hospital samtang si Chua gibalhug sa bilanggoan.  (BANAT NEWS)