CEBU, Philippines - Duha ka tawo nangamatay ug laing usa ang naangol human natumba ang gisakyan nila’ng motorsiklo ug dayon sila naligsan sa Ceres Bus nga ilang gikasugat didto sa Sitio Gaway, Barangay Uling, dakbayan sa Naga kaniadtong Sabado sa hapon. Ang kapolisan miila sa namatay nga sila si Marjun Bariquit, 17, ug Mark Anthony Clarete, 17, pulos ulitawo ug pareho nga nagpuyo sa mao nga dapit.
Ang drayber sa motorsiklo nga si Angelo Lecera, hingkod ang pangedaron ug silingan sa mga namatay nakaangkon lang og mga pangos sa kalawasan.
Ang report nga miabot sa Naga Police Station nga gipangulohan ni Superintendent Brindo Nacario nasayran nga samtang nagsubay sa national highway ang motorsiklo nga gimaneho ni Lacera milihok ang duha niya ka angkas.
Si Lacera wala na makapanimbang hinungdan nga natumba ang motorsiklo ug nabagnos ang tulo sa karsada ug nasalibay ngadto sa agianan sa kasugat nga sakyanan.
Ang mga saksi miingon nga naatol nga diha ang Ceres Bus nga gimaneho ni Jonaver Pongos nga gikan sa dakbayan sa Sugbu ug paingon unta sa dakbayan sa Toledo ug wala na mapugngi pa ug naligsan g’yud ang mga biktima.
Gidali pa unta pagdala ang mga biktima sa duol nga ospital apan tungod sa grabe’ng mga bali sa kabukogan nakabsan gayud sa ilang kinabuhi sa Bariquit ug Clarete.
Ang drayber sa Ceres Bus nga si Pongos mitahan dayon ngadto sa Naga Police Station ug nangangkon nga wala siya’y sala sa mao nga hitabo ug atubangon niya kun mokiha ang pamilya sa mga biktima. (BANAT NEWS)