CEBU, Philippines - Nakit-an nga nagbuy-od ug wala na’y kinabuhi ang usa ka mag-uuma didto sa basakan sa Barangay Bulak, Dalaguete kaniadtong Sabado sa buntag.
Ang biktima giila nga si Engracio Questas, 20, ulitawo, ug nagpuyo ra usab sa mao nga lugar.
Matud pa ni SPO1 Veronico Centino, desk officer sa Dalaguete Police Station, nga gikan’g namista ang biktima sa Barangay Poblacion ug katapusan kini nga nakit-an nga misulod sa diskohan.
Sa dugang pakisusi sa kapolisan, usa ka Felix Ostria ang misaysay nga iyang nadungog ang upat ka buto sa armas sa lawom na’ng gabii kaniadto’ng Sabado dili halayo sa ilang panimalay.
Tungod sa kahadlok ni Ostria, wala na siya migawas aron mohimo’g pakisusi ug buntag na dihang nanugway siya sa iyang kabaw nga nakit-an niya ang patay’ng lawas ni Questas nga nagbuy-od sa kahumayan.
“Mingaw man na nga lugar nga nakit-an ang patay’ng lawas, lagyo ang mga balay kay basakan man na nga dapit. Perfect place gayud kun naa’y moatang nimo didto,†matud ni SPO1 Centino.
Ang ulo ug dughan sa biktima adunay mga samad-pinusilan gikan sa wala pa matino nga kalibre sa armas.
Matud ni SPO1 Centino nga walay dautang record ang biktima sa ilang police station.
Wala pa gayud makakuha ang kapolisan og giya aron mahibaw-an kinsa ang nagpusil sa biktima. (BANAT NEWS)