Drayber sa mga PUJ minos ra’g kita karong bakasyon

CEBU, Philippines -  Mga drayber og passenger jeepney mitug-an nga minos ang ilang kita sa pagmaneho panahon sa bakasyon, apan gipaabot nga mosaka kini pagbalik kun mobukas na ang klase sunod buwan.

Adunay mga drayber nga mitug-an nga usahay mokolekta lang sila og kapin sa P1,000 sa usa ka adlaw ug kun minosan kini sa abang ug gasto sa krudo ug gasolina mabinlan na lang sila’g mga P400.

 Si Wilfredo Ligao, drayber sa PUJ nga magbiyahean sa Urgello-Port Area nga rota, miingon nga minos ang pasahero karong panahon nga walay klase.

 Matud ni Ligao nga makapamasahero lang siya og upat ka adlaw sa usa ka semana kay adunay laing drayber nga momaneho sa sakyanan sa ubang mga adlaw.  Ang Land Transportation Franchising and Regulatory Board (LTFRB) mitugot lang nga ‘tag P7.50 ang minimum nga pletehan sa mga PUJ, apan sagad sa mga drayber og PUJ mokolekta og P8.

 Daghang drayber nga nahinabi sa Banat Manobela mitataw nga mapugos sila pagkolekta og P8 sa labing duol nga destinasyon kay nihit kaayo ang ‘tag 25 sentimos nga ipanukli.

 Apan nabantayan nga bisan kadtong mosakay og PUJ nga magkauban ang upat ka pasahero unya motunol og P50 sa konduktor, P32 gihapon ang kolektahon gikan kanila imbis P30.  Kun ang mga road enforcers estrikto nga mopatuman sa balaod, ang mga drayber sigurado nga madakpan tungod sa ilang mga konduktor nga magkumpayot ug ang uban magbarog lang sa stepboard sa PUJ.

 Dili tanan’g drayber adunay konduktor apan sa bahin ni Ligao mas komportable siya nga adunay konduktor aron masiguro g’yud nga makolektahan og plete ang tanang mosakay.

 Laing drayber nga si Samson Liquigan, taga Barangay Lahug, mitug-an nga kaniadto wala siya magkuha og konduktor apan nakabantay siya nga daghang pasahero ang manaog lang nga dili moplete.  Sugyot sa mga drayber og PUJ nga unta ang mga pasahero adto ra gayud mag-atang og kasakyan sa mga “jeepney stops” kay madakpan sila sa paghunong sa wala itugot nga dapit.

Aron pagpaniguro nga dili sila maalkanse, matud ni Ligao nga usahay mapugos sila pagpasakay og pasahero sa mga “No Stopping Area” ug kun madakpan makamulta sila og P1,278 tungod sa “Disregarding Traffic Sign.”

Laing drayber og PUJ nga si Rusty Gutang miingon nga dili g’yud kalikayan nga aduna’y  mga traffic enforcer nga mapahimuslanon ug mangilkil sa mga drayber nga ilang dakpon. Adunay mga drayber nga miingon nga tungod sa pagtaas sa multahan sa traffic violation, usahay mapugos sila pagsuborno sa mga enforcer aron lang dili sakmiton ang ilang lisensya.

Giawhag sa mga drayber nga unta ang kagamhanan mohingusog sa pagpanakop sa mga bugoy ug sa mga dispatchers nga mangilkil sa mga drayber.

Ang kadagkoan sa kapolisan ug traffic enforcers wala gayud makasumpo sa mga dispatchers bisan pa og ang dakbayan sa Sugbo adunay ordinansa nga nagdili sa ilang kalihukan.

Giangkon sa ubang drayber nga may mga kauban sila nga aron pagwagtang sa duka sa ilang pagpamasahero, ilabi na sa gabii, mogamit sila og ilegal nga drugas sama sa shabu.

Atol sa mga roadside drug test nga ipahigayon sa Land Transportation Office (LTO), sagad sa mga mapositibo mao g’yud ang mga drayber og PUJ. (BANAT NEWS)