CEBU, Philippines - Duha ka tawo ang nagpakamatay sa dakbayan ug lalawigan sa Sugbo sa miaging adlaw.
Patay na’ng daan sa wala pa maabot sa tambalanan ang usa ka babaye nga napalgan nga nagkirig-kirig ug nagbuwa ang baba sulod sa iyang gipuy-ang kwarto sa dalan A. Lopez, Barangay Calamba, dakbayan sa Sugbo.
Ang namatay mao si Jinky Domecillo, 18, trabahante sa usa ka internet café. Nasuta sa kapolisan nga “multiple organ system failure secondary to suicidal toxic substance ingestion†ang hinungdan sa kamatayon sa mao nga babaye. Apan wala pa masuta kun unsa ang giinom sa maong babaye.
Sumala pa nga sa wala pa giingong naghikog si Domecillo nagkalalis kini ug sa iyang uyab.
Samtang namatay usab ang usa ka lalaki nga nagdunggab sa iyang kaugalingon gamit ang 15 ka pulgadas nga sundang didto sa Barangay Jumangpas, lungsod sa Samboan. Ang namatay nga si Henrito Aniñon, 24, gihulagway nga hilomon nga pagkatawo.
Si PO1 Jason John Geramis, desk officer sa Samboan Police Station, miingon nga sa wala pa maghikog si Aniñon nag-estoryahay kini ug ang iyang apohan.
Matud pa nga nagkaon og biscuit si Aniñon apan nananghid nga moinom og tubig sa ilang kusina, apan diay mihapit pagdunggab sa iyang tiyan.
Nakit-an na lang sa apohan ang iyang apo nga nagkadugo na ug nagtaroy sa iyang tiyan ang sundang.
Gidala unta sa Malabuyoc District Hospital ang biktima apan gideklarar nga namatay paglabay sa pipila ka gutlo. (BANAT NEWS)