Wanted sa tulis, carnapping dakpan
CEBU, Philippines - Nadakpan sa kapolisan ang usa ka tawo nga dugay nang wanted sa kasong robbery ug carnapping sa panimaye sa iyang gikapuyo sa sitio Santa Cruz, Barangay Guizo, dakbayan sa Mandaue niadtong Huwebes sa gabii.
Ang nadakpan mao si Jefse Lariosa Flores, 30, taga Jagna, Bohol.
Si PO1 Jerome Lendio sa Presinto 1 sa Mandaue City Police Office (MCPO) miingon nga nadakpan si Flores ni PO2 Arnel Gingco, PO1 Christian Avila ug PO1 David Omambac base sa warrant of arrest nga giluwatan ni Judge Estela Cinco sa Branch 55 sa Regional Trial Court (RTC)-7 ug Judge Allan Garciano sa Municipal Trial Court (MTC) sa dakbayan sa Lapu-Lapu.
Matud ni Lendio nga dugay na nga nag-atubang og kasong robbery ug carnapping ang akusado.
Dugang pa niya nga ang akusado kanunay makasibat sa higayun nga dakpon na sa kapolisan ug dugay na nilang wala igkita sa lugar.
Si Lendio miingon nga nakadawat sila og taho nga sa maong lugar nasigpatan ang akusado sa panimalay sa iyang gikapuyo hinungdan nga dali kini nilang gisikop.
Gipaabot sa kapolisan ang ubang biktima sa carnapping nga moila sa dinakpan nunot sa ilang pagtoo nga kini ang responsabli sa mga kaso sa dakbayan. (/GMR)(BANAT NEWS)
- Latest
