CEBU, Philippines - Blangko pa ang kapulisan sa lungsod sa Barili sa motibo sa pagpusil patay sa usa ka mag-uuma niadtong milabay’ng adlaw nga Miyerkules apan kagahapon na nakit-an.
Ang biktima giilang si Gregorio Laniohan, 59, nagpuyo sa Barangay Cagay, lungsod sa Barili. Sigun pa ni PO3 Rommel Patalinghug sa Barili Police Station nga nahinabi sa Banat News nga usa ka Wilfredo Tundag nga kauban ra ‘sab sa biktima ang nakakaplag kaniya nga wala na’y kinabuhi ang biktima nga dunay samad pinusilan.
Matud pa ni Patalinghug nga dunay samad pinusilan sa abaga ang biktima nga milapos sa pikas nga bahin sa iyang abaga gikan sa wala pa matino nga kalibre sa armas.
Sa imbestigasyon sa Barili Police Station, gitug-an ni Wilfredo Tundag nga katapusang nakita ang biktima gabii sa Mayo 13 kauban ang usa ka Santo Mabanag nga nag-inom.
Gipangita karon si Mabanag aron pangutan-on kabahin sa maong hitabo. (BANAT NEWS)