Seaman nag-snacks gidunggab, gipusil

CEBU, Philippines -  Usa ka seaman ang biktima sa pagpanunggab ug pagpamusil samtang nag-isnak sa usa ka bakery sa eskina Pagsabungan, dakbayan sa Mandaue sa niaging adlaw.

Ang biktima mao si Ian Rondina, 30, minyo, taga Bakhawan, lungsod sa Daanbantayan.

Giingong nagkaon og pan sulod sa bakery ang biktima sa dihang kalit lang niabot ang duha ka wala hiilhing lalaki ug ang usa milipot sa luyo sa biktima ug dayun dunggab sa bukobuko.

Misulay unta sa pagsukol si Rondina apan ang laing kauban mipusil apan daling nakahupo ug nakapasalipod sa lingkoranan hinungdan nga wala maigo ang biktima.

Si PO2 Richard Ares sa Presinto 3 sa Mandaue City Police Office miingon nga nagdali sila sa pagtubag sa maong alarma apan nakamatikod ang mga suspek ug daling nakasakay sa ilang motorsiklo palayo sa lugar.

Samtang naangol ang usa ka lalaki human gipusil sa tulo ka tawo nga nag-atang kaniya sa Barangay Tingub, dakbayan sa Mandaue niadtong Lunes sa hapon. Giila  ang biktima nga si Jecjec Bambao, hingkod, samtang ang namusil giingong mga kasarangan ang gidak-on sa panglawas ug nagsakay sa green Suzuki nga motorsiklo nga walay plate number.

Si SPO1 Antonio Descartin sa Presinto 4 sa MCPO miingon nga migawas sa ilang panimalay ang biktima kay may paliton sa tindahan.

Tulo ka wala hiilhing lalaki ang kalit lang namusil naigo sa paa ang biktima kinsa daling miligid hinungdan nga wala na maigo sa dugang pang pagpamusil.

Nipabulhot palayo luwan sa motorsiklo ang tulo ka tawo sa dihang pipila ka molupyo nga nakakita ang nakasinggit sa pagpangayo og tabang sa mga polis. (Romeo T. Limpangog/GMR)

Air Force nangandam sa pagguba sa Mactan Airbase

Gipangandaman sa Philippine Air Force sa Mactan Benito Ebuen Air Base ang pagguba sa ilang 17 ka mga edipisyo nga maapektohan sa Mactan-Cebu International Airport expansion project ning tuiga.

Matud ni 2nd Air Division Commander Maj. Gen. Romeo Poquiz nga ilang nasayran nga lima ka ektarya sa nahimutangan karon sa MBEAB ang maapektohan ilabi na sa habig sa runway sa maong tugpahanan.

Kini atol sa ilang panagtagbo sa kadagkoan sa MCIA, Department of Transportation and Communications ug kontraktor sa maong proyekto.

Lakip sa 17 ka edipisyong maapektohan ang base operation center, fire crash and rescue division, passengers terminal, hangar, armory, ramp ug uban pang edipisyo nga sulod sa lima ka ektaryang luna.

Apan matud pa ni Poquiz dili maapektohan ang ilang operasyon gumikan sa ilang kasabutan nga tukuron unang daan ang replika sa ilang mga edipisyo nga maapektuhan diin kinahanglan nga operational na kini sa dili pa sila mobalhin ug moguba sa ilang mga daang edipisyo.

Gumikan niini walay pagpangguba sa edipisyo sa MBEAB kung dili pa matukod ang ilang kabalhinan diin ang tanang gasto ug trabaho iya sa MCIA uban sa midaug nga kontraktor.

Ang maong proyekto sugdan karong buwana o sa sunod buwan sa Hunyo diin nagsugod na og sukod ang kontraktor sa maapektohan sa maong expansion project sa MCIA.  (BANAT NEWS)