CEBU, Philippines - Usa ka tinun-an ang naghikog patay pinaagi sa paglayat gikan sa third floor sa usa ka building, apan kaduha niya kini buhata human ang unang paglayat nasipyat maong mikatkat kini pagbalik sa ibabaw sa ilang boarding house.
Base sa inisyal nga impormasyong nakuha sa mga imbestigador sa Homicide Section sa Cebu City Police Office, adunay problema sa pamilya ug sa eskuylahan si Kim Varga, 21, taga Tres de Abril, Barangay Labangon, Cebu City, 4th year student sa kursong BS Biology nga nagtungha sa usa ka medical school ning dakbayan.
Sumala pa ni SPO1 Ruth Violango, imbestigador sa Homicide Section sa Cebu City Police Office nga Lunes sa gabii miduaw sa iyang amigo si Varga diha sa Urgello, Barangay Sambag Uno, ug mihangyo nga didto matulog sa boarding house niini.
Apan kagahapon sa buntag, usa ka Jalandoni Yuson nagpuyo ra’sab duol sa maong lugar ang nakakita kang Varga nga kalit niambak gikan sa rooftop sa maong boarding house, apan nasangit kini sa mga kable sa telepono ug napugngan ang gikusgon sa impact pagtugpa niini sa ubos.
Nakugang na lang si Yuson nga hinay-hinay nga mibarog si Varga ug mibalik og saka sa rooftop agi sa likod sa boarding house ug subling miambak, ug ning higayona, adto kini mitugpa sa konkretong bahin sa sud sa compound ug maayong pagka buak sa ulo niini.
Dali unta kining gidala sa Cebu City Medical Center apan gumikan sa grabeng bali sa dughan ug sa ulo patay na kini.
Sumala pa ni Violango, gikan sa pamahayag sa amigo ni Varga nga si Daryl Medellin, ang namatay misugilon niya nga duna kini problema sa pamilya ug sa iyang pagtungha.
Sa laing bahin, usa ka Herihildo Delos Santos, 47, ang naghikog sud sa iyang lawak sa ilang balay sa Barangay Calabo-on, Dumanjug.
Matud pa ni SPO1 Samuel Casipong sa Dumanjug Police Station nga nahinabi sa Banat News nga ang igsuon sa namatay nga si Estela Delos Santos mitug-an nga aduna’y nervous breakdown ang igsuon.
Gamit sa biktima ang usa ka pisi nga gihikot sa taas nga bahin sa iyang lawak ug dayon hikot sa iyang liog. (BANAT NEWS)