CEBU, Philippines - Human sa tulo ka adlaw mitingog na ang usa sa mga opisyal sa Cebu Puericulture Center and Maternity House kabahin sa ilang nurse nga gidudahang nagbutang og plaster sa bag-ong panganak nga bata niadtong Biyernes.
Matud ni Medical Doctor Raida Varona, nagpahigayon na ang ospital og lawom nga imbestigasyon sa maong reklamo, apan nagdumili siya pagtubag kun nurse o midwife ang mihimo niini sa bata. Apan, mipasalig siya nga tanang mi-duty atong adlawa apilon sa imbestigasyon.
“Gagging? No, there’s no such thing as gagging. This is not a protocol,†matud ni Varona. Bisan og limitado lang ang iyang tubag iyang gipasalig nga ilang atubangon ang mga ginikanan sa bata.
Ang mga ginikanan sa bata mipasabot nga andam silag makig-alayon sa imbestigasyon sa maong tambalanan. Malaumon silang makagawas na ang ilang anak sa maong tambalanan karong adlawa human sa usa ka semanang pagpaalim gumikan sa impeksyon.
Sa laing bahin, si Regional Director Jaime Bernadas sa Department of Health (DOH) 7, miingon nga mao kini ang labing unang kaso nga “malpractice†ubos sa iyang termino.
Sigon pa ni Bernadas nga bisan og wala pa misumiter og formal complaint ang ginikanan, mopahigayon sila og imbestigasyon sa maong insidente.
Apan ang maong plano ni Bernadas gipakgang dayon ni Varona kinsa miingon nga problema man kini sa ilang tambalanan.
Apan si Bernadas miingon nga kanunay nga dunay katungod ang DOH ilabi na kun ang pagpalambo sa serbisyo ug regulasyon sa health facilities na maoy hisgutan.
Dugang niya nga bisan ang paggamit og pacifier dili advisable kay matud pa nga usa kini sa hinungdan sa kontaminasyon sa bata. (/EIM)(BANAT NEWS)