Task Force, NBI maghiusa sa kaso sa missing trees

CEBU, Philippines - Giaghat sa Department of Environment and Natural Resources-7 ang mga imbestigador sa National Bureau of Investigation-7 nga makigtagbo sa Regional Anti-Illegal Logging Task Force sa rehiyon.

Kini aron hingusgan ang pagpangita sa nahanaw nga mga kahoy nga gitanum sa center island sa Sergio Osmeña Boulevard, dakbayan sa Sugbo.

Matud ni DENR-7 Executive Director Dr. Isabelo Montejo sa iyang sulat nga gipadala ngadto kang NBI-7 Regional Director Max Salvador nga importante kaayo ang pagpakig-alayon sa duha ka pwersa alang sa mas dali nga pagpangita sa nangahanaw nga kahoy.

Gipahibawo ni Montejo nga ang coordination meeting tali sa task force ug NBI-7 pagahimoon karong Mayo 15 sa alas 2 sa hapon sa Conference Hall sa DENR-7 New Administration Building sa Greenplains Subdivision, Banilad, dakbayan sa Mandaue.

Malaumon si Montejo nga dili balibaran ni NBI-7 ang naasoy nga coordination meeting. (BANAT NEWS)