CEBU, Philippines - Giplano sa Commission on Election (COMELEC) sa dakbayan sa Mandaue ang pagpahigayon og pagpangrehistro sa mga bag-ong botante sa kabarangayan sa umaabot nga mga adlaw.
Kini ang nasayran sa Banat News kang Jocky Reuyan , assistant election officer sa maong dakbayan nga nahinabi niadtong miaging adlaw.
Matud pa niya nga nagpaabot lamang sila sa paghan-ay nga pagahimoon sa mga barangay kapitan sa 27 ka barangay sa dakbayan alang sa pagtakda sa adlaw sa satellite registration.
Tumong niini ang paghatag og kasayon sa mga nagtinguha sa pagparehistro nga bag-ong botante nga way oras tungod sa mga trabaho ug uban pang kakulian pag-adto sa ilang buhatan.
Ang mga batan-on nga anaa na sa 18 anyos sa ikaduhang Domingo sa 2016 nga maoy adlaw sa pagpahigayon sa piniliay mahimo na usab nga magparehistro sanglit gitugot na man niini pagbotar.
Gitataw usab ni Reuyan nga hangtod pa sa Oktobre 2015 ang ilang pagpangrehistro sa bag-ong mga botante ug bukas ang ilang buhatan sa adlaw nga Domingo hangtod sa Biyernes sa matag semana.
Ang adlaw nga Domingo maoy gihatag nga kahigayonan niadtong mga nagtrabaho o mga tinun-an sa kolehiyo sa pagparehistro. (BANAT NEWS)