Mama sa batang giplasteran ang baba masulob-on sa Mothers’s Day

CEBU, Philippines - Wala makasaulog sa Mother’s Day ang inahan sa bata nga gi-plasteran ang baba sa usa ka kuna sa nursery room sa usa ka pribadong tambalanan sa dakbayan sa Sugbo.

Matud sa inahan sa bata nga masulob-on ang iyang adlaw nga unta kuyog nila ang bag-o ug una nilang anak sa iyang pares sa kasaulogan.

Mikatap sa Facebook niadtong Sabado ang hulagway sa bata nga gi-post sa iyang amahan.

Matud pa nga ang attending nurse miingon sa inahan sa bata nga gitaptapan kini tungod sa kasaba sa bata nga sige og hilak.

Pagkahuman sa maong insidente, matud sa inahan nga mosugot lang siya kun makig-areglo ang taga tambalanan ug kun mangayo og pasaylo ang mibuhat niini. Apan sa ilang pagbalik sa tambalanan, nausab ang estorya sa nurse sa iyang pediatrician.

Giingong gibutangan ra sa nurse og pacifier ang baba sa bata ug gitaptapan og plaster aron dili kini matangtang.

Gikuwestyon sa inahan kun apil sa ilang protocol sa pagbutang og pacifier nga butangan usab og plaster ang baba sa bata.

Matud niya nga kun gi-sip-on ang bata tungod sa airconditioned nga kwarto ug mag-clog ang ilong niini, posibleng mamatay iyang anak kay gitaptapan naman ang baba niini.

Gipangayoan sa amahan og video file ang tambalanan aron makahibawo sila kun kinsa gyud ang nagbuhat apan matud sa supervisor wala’y CCTV sulod sa nursery room. Nagpaabot ang ginikanan sa bata sa opisyal nga tubag sa tambalanan samtang giandam usab nila ang legal nga lakang.  (BANAT NEWS)