P.5M nga pekeng Habagat bags gikompiska

CEBU, Philippines - Mokabat ngadto sa P.5  milyon ang kantidad sa mga pekeng Habagat back packs ang nakompiska sa gipahigayong pagpangronda sa Investigative and Detective Management Branch (IDMB) sa Mandaue City Police Office niadtong Biyernes sa gabii gikan sa mamuhatay niini diha sa may Sitio Isla de Palma sa Barangay Looc, dakbayan sa Mandaue.

Dala nila ni Senior Inspector Jimmy Fortez ang search warrant nga giluwatan ni Regional Trial Court (RTC) Judge Teresita Galanida sa Branch 56 sa mao nilang pagpangronda sa usa ka factory diha sa nahisgutang lugar nga giingong namuhat og mga pekeng Habagat bags.

Ang “trademark owner” sa Habagat  Outdoor Philippines mireklamo ngadto sa korte nga ang ilang trademark design gikopya sa nahisgutang factory nga gironda kinsa ang mamuhatay sa mga pekeng Habagat bags giila lang sa ngalan nga “Richard” ug wala diha sa shop atol sa pagpangronda sa kapolisan.

Atol sa pagpangronda nakompiska sa mga polis ang raw materials sa paggama og back packs nga mikabat ngadto sa P100,000 ang kantidad ug upat ka sewing machines nga ang mga presyo gibana-banang mokabat gikan sa P90,000 ngadto sa P100,000 matag usa.

Si Fortez nagkanayon nga matud pa ni Pamela Deche, production manager sa Habagat  kinsa mikuyog atol sa pagpangronda nga mahibaw-an ang usa ka Habagat backpack kun peke ba kini o original pinaagi sa zipper.

Ang original nga Habagat bag naay marka nga “Habagat” sa zipper niini apan ang peke nga gipamuhat walay marka.

Nasayran usab nila gikan sa mga mananahi nga ang ilang ginama nga mga bag gibaligya sa “wholesale” nga presyo gikan sa P250 ngadto sa P300 diin barato kini kompara sa original nga Habagat nga nagkantidad og P650 ngadto sa P700 matag usa.

Nasayran usab nga ang mga mananahi makahuman og tag-50 ka mga backpack matag adlaw.

Dugang ni Fortez dili nila masikop ang tulo ka mga mananahi sanglit maoy nalatid sa search warrant nga igo lamang silang mokompiska sa mga ebidensiya sa paggama sa mga bag.

Dugang usab sa hepe nga mag-agad sila sa korte kung kinsa ang mapasakaan og kaso sanglit wala nila mailhi ang apilyedo ni “Richard” tungod kay  ang mga mananahi niini nagdili sa pagsulti.

Kasong paglapas sa Section 155 sa  Akta Republika 8293 kon “Intellectual property code of the Philippines” ang mapasaka ngadto sa responsable sa higayon nga mailhan na gyud kini.  (BANAT NEWS)