Sakyanan sa City Hall gi-clamp

CEBU, Philippines - Usa ka multicab nga gipanag-iya sa Cebu City Hall wala g’yud pasayloa sa mga sakop sa City Traffic Operations Management (CITOM) ug gi-clamp ang ligid niini kay gibiyaan sa dalan Pelaez kagahapon sa kaadlawon.

Gituohan nga ang nagmaneho sa mao nga Multicab (SJM 459) misulod sa duol nga Bikini Bar mao nga wala makabantay nga gi-clamp sa mga traffic enforcers ang sakyanan. Ang mao nga multicab apil sa walo ka sakyanan nga gi-clamp sa CITOM kagahapon sa kaadlawon kay gi-parking ra daplin sa mga karsada.

Aduna pa’y usa ka Beer Grande nga diha sa lingkoranan sa multicab nga wala g’yud makuha hangtud kagahapon sa udto. Si Joy Tumulak, CITOM operations chief, miingon nga walay ilhon ang iyang mga sakop kay bisan sakyanan sa kagamhanan i-clamp g’yud nila kun masakpan nga gi-parking sa karsada.

Miabut na og 34 ka sakyanan ang na-clamp sa CITOM sukad sa miagi’ng semana kay nakababag sa pag-agi sa ubang sakyanan nga peligroso kun adunay emerhensya.  (BANAT NEWS)