Comelec magbutang unya og satellite registration
CEBU, Philippines - Nagplano karon ang Commission on Election (COMELEC) nga mopahigayon og satellite registration ngadto sa mga piniling mga lugar sa kalungsuran ug siyudad sa lalawigan sa Sugbo.
Kini aron mahatagan og kahigayonan ang mga bag-ong botante nga anaa nagpuyo sa lagyong dapit nga makaparehistro niining gisugdan nang continuing registration.
Sigon pa ni Election Officer Atty. Ferdinand Guijilde sa Comelec provincial office nga ang ilang buhatan nagtinguha nga magbutang og satellite registration sa probinsiya.
Matud pa ni Guijilde nga gikatakda nga ila kining ipahigayon duha ka bulan gikan karon. Gipasabot niini nga sa bulan pa sa Hulyo o kaha sa Agusto nila sugdan ang satellite registration tungod kay gipaabot pa sa ilang buhatan nga mohubas ang gidaghanon sa mga bag-ong botante nga nidagsa karon sa tanang mga Comelec offices sa probinsiya.
Dugang pa niini nga gitinguha karon sa Comelec nga daghan ang makarehistro karon aron maengganyo usab kini nga makabotar sa umaabot nga presidential ug local election sa tuig 2016. (BANAT NEWS)
- Latest
