CEBU, Philippines - Naputol ang kalipay sa usa ka lalaki nga gikasal kagahapong adlawa human sikopa sa kapulisan sa Argao sulod sa simbahan sa Barangay Poblacion lungsod sa Ronda. Ang kapulisan pinanguluhan ni Argao police chief, Insp. Alejandro Batobalonos nagpaabot una nga mahuman ang seremonyas sa kasal una nila gidakop si Angelito Tanaid, 39, taga-Barangay Anahaw, Argao mga alas 7:00 sa buntag sulod sa Our Lady of Sorrows Parish Church.
Ang kapulisan armado sa warrant of arrest sa kasong four counts of attempted murder nga giluwatan ni Regional Trial Court Judge Maximo Perez, Branch 26, Argao, dihang gisikop nila si Tanaid.
“Gikasal man diay mao ‘to amo na lang gipaabot nga mahuman ang seremonyas una namo siya dakpa...nakabarong pa gani siya,†matud ni Batobalonos.
Daling gimandoan ni Batobalonos iyang mga sakop sa pagbantay sa tanang pultahan sa simbahan aron dili makasibat ang suspek. Ug sa dihang miposing na aron sa pagpahulagway ang bag-ong kasal gisikop sa kapulisan si Tanaid. “Daan na man gud ni siya nga di gyud magpadakop kay wala kuno siya’y ikapyansa nga P480,000 sa four counts of attempted murder niya nga kaso kay tag-P120,000 man ang kada usa,†matud sa hepe.
Ang kapulisan ikalima na misuway sa pagsikop kang Tanaid apan karon lang kini nila sakpi.
“Nagyaka na lang tawon ‘to sa simbahan unya nagkagubot na man pagsikop namo kay diha man ang paryente sa duha pero kahibalo na gud nang daan ang asawa nga naay kaso ang suspek,†matud ni Batobalonos.
Daku sab ang kahikurat sa pari nga kora paruko sa simbahan nga mihimo sa kasal nga pinangita diay sa kapulisan ang lalaki. Ang asawa ni Angelito nga si Mryna, giingon nga perting hilak atubangan sa kapulisan nga miyaka pa sa simbahan ug mihangyo og pwede ba sila nga modiretso sa reception sa ilang kasal.
“First time pa gyud ‘to nako nga nagbarong pa ang akong gidakop, sulod pa gyud sa simbahan, sige na mi og pangita ani niya, dili pa ‘ko ang hepe diri gipangita na gyud ni siya, idlas lang gyud,†matud pa ni Alejandro Batobalonos. Si Tanaid kanhi miyembro sa usa ka gun-for-hire group sa Barangay Anahaw. Ang grupo nalambigit og pipila ka mga pagpamusil lakip na ang pagpusil patay kang PO1 Julius Amarillo adtong 2004 apan na-acquit ang kasong murder human mitahan si Nicanor Antiga, taga Barangay Catolaroy, Sibonga ngadto sa kapulisan adtong 2006.
Apan tungod sa mga pipila ka mga pagpamusil nailhan si Tanaid sa ubang mga biktima hinungdan nga napasakaan kini og kaso. (BANAT NEWS)