CEBU, Philippines - Bana nga nagpakiluoy apan gibalibaran nga dili na unta mobalik sa abroad ang iyang asawa naghikog, samtang usa ka empleyado sa usa ka mall ang naghikog sa managlahing dapit sa Sugbo.
Alas-10 sa buntag niadtong Biyernes sa Barangay Mandiligid, Argao, usa ka Benigno Albo, 43, ang nagpusil sa iyang kaugalingon tungod kay nangluod.
Sumala pa ni Police Inspector Alejandro Batobalonos, hepe sa Argao Police Station nga nahinabi sa Banat News nga ang asawa ni Albo giingon nga lima na ka tuig nagtrabaho sa Abu Dhabi ug bag-o pa lang nakauli sa Argao apan gusto na usab mobalik didto.
Matud pa nga sa dihang gibalibaran sa asawa ang hangyo sa iyang bana, dali kini nga midagan sulod sa balay, nagpasalba sa iyang armas ug gituohang nagpusil sa iyang kaugalingon tumong sa iyang dughan.
Dali unta nga mitabang ang iyang asawa ug mga silingan sulod sa ilang panimalay apan sa diha nga ila unta nga giduol si Albo nga naghigda na, miisa pa kini sa iyang kamot nga naghawid sa kalibre .45 nga pistola, hinungdan nga nanagan ang mga tawo ug ilang nakita nga nagpusil na ‘sab kini tumong sa iyang ulo.
“Mura’g wala na gyud siya’y gusto mabuhi pa kay mipusil pa man gyud siya og kaduha, sa ulo na gyud dul-it,†matud pa ni Batobalonos. Gidala pa unta sa labing duol nga tambalanan ang biktima, apan patay na kini.
Samtang patay nang nadiskobrehan ang usa ka checker sa usa ka mall sulod sa iyang giabangan nga kwarto sa dalan Borromeo sa Pahina-Central pasado alas 8:00 sa miaging gabii ang naghikog nga naila nga si Michelle Guiamlod, 26, lumad nga taga dakbayan sa Zamboanga.
Nakarekober ang kapolisan og duha ka suicide note sa kwarto sa maong babaye. (Jojo Ugdol , Bryner L. Diaz ug nila Evelyn C. Espinosa ug Keziah Astillo,CNU Interns/EIM) (BANAT NEWS)