Upat ka trabahador natagak sa atop, usa ang patay

CEBU, Philippines - Patay ang usa ka lalaki ug angol ang tulo ka mga kauban niini human sila matagak gikan sa atop sa usa ka building nga ilang giilisan og atop pasado alas 5:00 sa miaging adlaw sa Barangay Lagtang sa dakbayan sa Naga.

Ang namatay naila nga si Jenny Tapinit, lumad nga taga Negros Oriental.

Samtang angol sila si Henry Sinangote, 30, Thaniel Verallo, 19, Junnel Besuyo, 19 nga mga molupyo sa dakbayan sa Bogo.

Base sa imbestigasyon sa kapolisan nga ang upat mga empleyado sa Macro Star Contractor. Matud pa nga ang maong kontraktor maoy gitahasan sa pag-ayo sa atop sa UNACO Company.

Apan dihang didto na sa atop ang mga biktima nadakin-as ang usa nila hinungdan nga nagkinuptanay silang upat apan nangatagak silang tanan sa ubos ug maoy nagrabihan si Tapinit hinungdan sa iyang kamatayon.

Kasamtangang nagpaalim pa sa kadaot sa ilang kalawasan ang tulo sa  Vicente Sotto Memorial Hospital. (BANAT NEWS)