CEBU, Philippines - Gidili ang pagpaninda daplin sa kadalanan atubangan sa National Shrine of Saint Joseph ug sa mga dalan sa Barangay Centro sa dakbayan sa Mandaue sa pagsaulog sa kapistahan ugmang adlawa.
Kini ang pasidaan ni Edwin Ermac, operation chief sa Traffic Enforcement Agency of Mandaue (TEAM).
Matud niya nga ilang sakmiton ang mga baligya sa manindahay nga moladlad sa daplin sa karsada sa Barangay Centro aron dili makasamok.
Ang daplin sa dalan sa W.M. Seno padulong sa Cebu International Convention Center (CICC) mao lang ang dapit nga ilang gitugot diin makaladlad sa mga baligya.
Bisan ang pagbutang og lata nga dagkotanan og kandila sa gawas sa simbahan sa Saint Joseph lakip kini sa ilang sakmiton sanglit makahatag man kini og kasamok sa lugar ug makahasol sa mga tawo nga mosulod sa simbahan sa maong adlaw.
Si Ermac miingon nga ang tanan nilang traffic enforcers ilang idestino sa kadalanan sugod alas 6 sa buntag ugmang adlawa hangtod na sa kaadlawon.
Si Senior Supt. Petronelli Baldebrin, direktor sa Mandaue City Police Office (MCPO), mopahimutang usab og mga polis sa palibot sa simbahan nga maoy tahasan sa pagbantay sa kahapsay ug kalinaw.
Samtang gikatakdang sirhan ang mga dalan nga nagtadlas sa simbahan sugod sa alas 6 ang takna sa gabii karong adlawa nga mao usab ang pagpahigayon sa prosesyon sa imahen ni Senyor San Jose kauban sa imahen ni Birhen Maria ug Senyor Santo Niño. Naglakip sa mga dalan nga ilang sirhan atol sa prosesyon mao ang dalan A. del Rosario, S.B. Cabahug, ug Catalino C. Ouano.
Matud ni Ermac ang mga traffic enforcers maoy mogiya sa mga drayber sa pagsubay sa dalan nga mahimong kaagian sa mga PUJ o mga pribadong sakyanan.
Gitataw niya nga ilang ablihan alang sa pag-agi sa mga sakyanan sa oras nga hingpit na nga mahuman ang prosesyon ug ang mga karo nga giluwanan sa mga imahen hingpit na usab nga makasulod og balik sa simbahan.
Nagtoo si Ermac nga ang gibanabanang 5 mil ka deboto sa niaging tuig nga nikuyog sa prosesyon madoble pa sa pagkakaron. (/GMR)(BANAT NEWS)