CEBU, Philippines - Si Bise Mayor Romeo Villarante mikwestiyon sa mga proyekto nga giimplementar sa siyudad bisan og walay approval sa konseho.
Atol sa gipahigayong session sa konseho sa Talisay si City Administrator John Yre De Los Reyes kinsa mao usab ang chairman sa Bids and Awards Committee (BAC) gipatawag kini sa konseho aron paesplikahon sa mga proyekto sa siyudad nga giimplementar bisan og wala pay aproba sa konseho.
Apan si De Los Reyes wala makatungha kagahapon sa buntag hinuon nagpadala kini og suwat ngadto kang Villarante sa rason sa pagkapakyas niya og tungha.
Si De Los Reyes mirason nga duna siya’y pre-bid schedule atol sa oras sa session sa konseho.
Gipasalig niini nga estriktong gisunod ang implementing rules and regulations sa pagpahigayon og bidding.
Nunot niini, si Konsehal Edward Alesna chairman sa committee on budget and finance sa konseho sa Talisay misugyot sa pagpahikling una sa gipalabang nga committee report nga nag-awhag sa paghatag og pagtugot kang Mayor Johnny De Los Reyes sa paggama og kontrata tali sa winning bidders sa mga proyekto nga mikabat ngadto sa P1.2 milyones. Ubos sa City Council House Rules nga kung ang committee report sa proposed ordinance o resolusyon dili favorable ipahikling lang una kini o “laid on the table.†(/EIM)(BANAT NEWS)