CEBU, Philippines - Usa ka janitor sa Land Transportation Office (LTO) sa sangang buhatan sa Danao City ang gidakop kagahapon alas 12:15 sa kaadlawon atol sa gihimo nga buy-bust operation sa maong dakbayan.
Ang suspek giila nga si Isvirgil Durano Lictones, 28, janitor sa LTO ug lumulupyo sa Duterte St. Suba , Danao City ug nadakpan diha sa Beatriz D. Durano St., Poblacion sa mao gihapong dakbayan.
Nakuha kaniya ang P200 nga buy-bust money, napulo ka gagmay’ng paketeng gituohang shabu ug P400 nga gituohang halin sa illegal drugs.
Nadakpan si Lictones sa Danao City Anti-Illegal Drugs Special Operations Task Group nga gipanguluhan ni Senior Inspector Ceasar Garcia Misola. Si Lictones gikatakdang kasohan kagahapon sa hapon diha sa piskalya. (/EIM)(BANAT NEWS)