5 pakete shabu sakmit
CEBU, Philippines - Lima ka gagmay’ng pakete sa shabu ang nasakmit gikan sa usa ka gikatahapang drug pusher sa Barangay Paknaan, dakbayan sa Mandaue alas 2 sa kaadlawon kagahapon.
Si PO1 Jerome Lendio sa Presinto 1 sa Mandaue City Police Office (MCPO) miila sa nadakpan nga si Deodelon Cabreros, 27, ulitawo nga nagpuyo sa maong dapit.
Matud ni Lendio nga pipila ka molupyo sa maong dapit ang nipahibawo kanila labot sa ilegal nga kalihukan sa suspetsado sa panahon sa gabii.
Si Chief Insp. Jimmy Aguisanda, hepe sa maong presinto, nimando sa pagpaniid sa ilegal nga kalihukan ni Cabreros hangtud napahigayun ang buy-bust operation.
Ang team nga gilangkuban nilang PO1 Rogien Soquiño ug PO1 Mar Villarante ang nihimo sa operasyon ubos sa pagtugot sa Philippine Drug Enforcement Agency-7. Nunot sa pagkasignit ni Cabreros, girikisa sa mga polis ang bulsa sa suspetsado ug nakuha ang dugang upat pa ka paketeng shabu.
Kasong kalapasan sa Section 5, Article II sa Republic Act 9165 kon Comprehensive Dangerous Drug Act of 2002 ang atubangon sa dinakpan. (BANAT NEWS)
- Latest
