170 kaso sa HIV sa dakbayan

CEBU, Philippines - Gibanabana nga miabot na og 170 ka tawo ang natakboyan og human immunodeficiency virus (HIV) nga maoy sinugdanan sa Acquired Immune Deficiency Syndrome (AIDS) dinhi sa dakbayan sa Sugbo sukad lang sa Enero hangtud  Marso niining tuiga.

Ang 84 niini giingong tiggamitan og injectible illegal drugs ug ang uban nakuha tungod sa pakighilawas sa bayot.

Matud ni Dr. Ilya Tac-an dili kaayo layo ang gidaghanon sa nataptan og HIV sa samang period sa milabay’ng tuig. Apan sa 2012 report sa Philippine News Agency, ang Cebu City Health Department (CHD) nakarekord og 188 ka kaso sa HIV infections.

Giawhag ni Tac-an kadtong mga tawong nagdudang duna silay sakit nga HIV sa pagpailawom sa libreng Voluntary Counseling Testing  aron sila maatiman.

Aduna usab silay laing programa nga nag-uluhan, Prevention of Mother to Child Transmission nga gisugdan niadtong 2013. Kadtong mga nagsabak nga may HIV maatiman dayon.

Sa pagkakaron, adunay lima ka mga satellite laboratory ang maong programa dinhi sa Sugbo. Kini nahimutang sa Mabolo, Pardo,  sa Parian, sa Punta Prinsesa,  ug sa Bario Luz ug ila sab gibutangan ang Talamban.

Ang mga gasabak nga mag positibo sa HIV dalhun sa Vicente Sotto aron sila matambalan. (BANAT NEWS)