Tulisan nga nanunggab nadakpan
CEBU, Philippines - Nasikop sa kapolisan ang usa sa duha ka mga suspetsado nga mitulis ug midunggab sa usa ka lalaki sa Ruby Street, Sta. Teresita, Barangay Tisa sa dakbayan sa Sugbo sa alas 8:00 sa miaging buntag
Ang nasikop naila nga si Amanidad Jemar, 18, sa Sitio Manggahan, Barangay Punta Princesa. Samtang ang biktima naila nga si Jafet Flores, 23, nga nakaangkon og samad sa iyang lawas.
Atol sa maong hitabo, naatlan nga miagi si SPO2 Jeffrey Diola sa City Intelligence Branch sa maong lugar ug nakakita sa komosyon nga nahitabo hinungdan nga dali kining miresponde.
Nasikop ni Diola si Jemar ug dihang girekisa kini nasuta nga may dala nga posporo ang suspetsado nga may sulod nga pinauga nga dahon sa marijuana.
Apan wala na marekober ang cellphone sa biktima nga mobalor og P23 mil tungod kay mipasirit gilayon ang kauban sa dinakpang si Jemar. (BANAT NEWS)
- Latest
