CEBU, Philippines - Pito ka barangay sa dakbayan sa Toledo ang tukoran og dugang school buildings aron dili na maghuot ang mga tinun-an sa pipila lang ka lawak saringan.
Si Toledo City Councilor Sozimo Abellanosa mipahibalo sa mga barangay nga makaangkon unya og bag-o nga school buildings mao ang Bulongan, Bagakay, Cabitoonan, Cambang-ug, Dumlog, Matab-ang ug barangay Captain Claudio.
Ang mata’g school building nga adunay ‘tag lima ka classrooms gigahinan og P4.7 milyones.
Si Mayor John Henry Osmeña miingon nga iyang tinguha nga katukuran og dugang classrooms ang tanang barangay aron dili na maghuot ang mga tinun-an ug makatarong sila pagtuon.
Base sa balaod, ang usa ka Local Government Unit mogahin gayud og uno porsiyento sa kinatibuk-an niini nga koleksyon gikan sa Real Property Tax (RPT) alang sa Special Education Fund.
Ang SEF gamiton lang sa pagpatukod ug pagpaayo sa mga tunghaan, apil ang pagpamalit og libro ingon man uban pa nga kagamitan.
Gibutyag ni Department of Education (DepEd) Toledo City Schools’ Division Superintendent Ronald Gutay nga hayan mosaka ang gidaghanon sa mga estudyante sa pagbukas sa klase sa buwan sa Hunyo. (BANAT NEWS)