CEBU, Philippines - Samtang kusganong gimando sa director sa kapolisan sa Central Visayas ang subsob nga anti-criminality campaign ilabi na ang pagpanghilabot sa mga butang sa ubang tawo, way giila ang mga kawatan bisan kinsay ilang mabiktima.
Kini human ang mismong sakyanan ni Police Regional Office-7 Director Danilo Constantino mao na ang gilungkab ug gikawatan sa mga gamit sa sud niini.
Ang maong sakyanan matud pa gidala sa kapikas ni Constantino ug gi-parking sa usa ka parkingan sa usa ka kan-anan diha sa barangay Pusok sa dakbayan sa Lapu-Lapu niadtong Mayo Uno ning tuiga.
Si Lapu-Lapu City OIC Police Office Director Senior Superintendent Armando Radoc mimando na sa pagpa-imbestigar sa maong pagpanglungkab.
Gimandoan ni Radoc ang iyang mga operatiba nga pangitaon gyud kun si kinsa kadtong milungkab sa sakyanan sa heneral.
Gituohang mga “bukas-kotse†gang ang responsable sa maong pagpangawat samtang nagkaon ang kapikas sa heneral ug drayber niini diha sa maong kan-anan nianang adlawan pa.
Sa pakisusi sa Banat News, wala ma-blotter ang maong hitabo sa Station 5 diin masakop ang barangay Pusok, ug bisan na sa Theft and Robbery Section sa Lapu-Lapu City Police Office.
Hinoon giangkon ni Radoc nga wala dayon makapa-blotter ang kapikas. sa heneral tungod sa kakulba nga gibati niini atol sa hitabo, apan gipahibalo niini ang iyang bana kinsa mao nay mitawag kang Radoc bahin sa insidente.
Matud pa ni Radoc gibuak sa mga kawatan ang bintana sa awto ug gikuha ang bag nga adunay sud nga mga mahalong butang.
Si Constantino na maoy personal nga mitawag ngadto ni Radoc alang sa pag-imbestigar sa maong kaso.
Matud pa ni Radoc talagsa ra kaayo nga dunay kaso sa “bukas kotse†sa Lapu-Lapu sukwahi sa ubang siyudad, ug misaad nga ilaha kining pangitaon. (BANAT NEWS)