CEBU, Philippines - Nahatag na sa Department of Interior and Local Government ang pasiunang pundo alang sa rehabilitasyon sa mga inprastraktura sa gobyerno nga gikuso-kuso sa bagyong Yolanda sa amihanang Sugbo.
Sa 16 ka apektadong lokalidad, 13 niini ang nakadawat sa tseke nga gipangapod-apod sa Kapitolyo kagahapon pinaagi sa tagsatagsa ka mayor. Kadto lang mga munisipalidad nga nakaduso sa ilang program of works ang gihatagan sa maong pundo.
Kapin sa P80 milyones ang gipagawas nga pundo sa DILG sa unang hugna sa rehabilitasyon samtang padayon pa nga gilihok ang laing pundo.
Si Gob. Hilario Davide III sa iyang bahin malipayon ug mapasalamaton sa DILG sa tabang nga gihatag sa nasudnong kagamhanan alang sa rehabilitasyon sa mga lungsod nga apektado sa Yolanda.
Ang gobernador miingon wa pa siya’y kasayuran kun ang pundo nga gipagawas kabahin ba sa P10 bilyones nga ilang gipangayo. Apan si Medellin Mayor Ricardo Ramirez gilangayan ra kaayo sa paghatag sa nasudnong kagamhanan sa hinabang.
Matud pa ni Ramirez nga nigamit na lang sila sa kaugalingong pundo sa lungsod aron sa pagpaayo sa ilang merkado publiko ug munisipyo.
Si Daanbantayan Mayor Augusto Corro sa iyang bahin nagkanayon nga maayo na lang kaayo ang maong pundo aron makabarug og balik ang mga inprastraktura nilang naguba tungod sa bagyo. (/GMR)(BANAT NEWS)