Puya naluwas tungod sa iro

CEBU, Philippines - Tungod sa usig sa iro naluwas gikan sa tinong kamatayon ang usa ka pito pa ka buwang puya nga giabandonar sa iyang 18-anyos nga inahan diha sa sapa sa Osmeña Drive, Barangay Labangon, Cebu City kagahapon sa buntag.

Ang maong puya nga usa ka lalaki, naluwas sa mga sakop sa rescuers sa Barangay Sambag II samtang temporaryong gikustodiya ang 18-anyos nga dalaga nga gidudahang maoy inahan sa puya nga nagpuyo sa maong dapit. Ang duha gidala sa Cebu City Medical Center.

Sumala pa sa usa ka residente, nadisturbo sila og maayo sa pagsige og usig sa iro sayo sa kabuntagon  tungod kay daw duna kini giusig nga susama og tingog sa iring.

“Nagtuo ko nga iring iyang kontra kay diha may iring sa duol maong gibugaw na pud nako,” matud pa sa maong babaye kinsa mihangyong di magpahingalan sa report sa TV5 Aksyon Bisaya.

Tungod sa maong di ordinaryong pag-usig sa maong iro iyaha kining giduol ug diha niya nasiplatan ang nagkulob nga puya nga walay bisan unsang tabon.  Ang ginang nagduda gyud sa iyang nakita maong iyaha kining gipadul-an ug nakurat siya pagkakita sa mga gamay kaayong kamot sa puya nga naglihok.

Wala siya maglangay ug dali siyang misinggit pagpangayo og tabang sa mga silingan ug nagpangutana kung si kinsa kahang inahana ang makahimo niini ngadto sa iyang anak. Laing silingan ang matud pa nga misambat sa estorya sa pag-ingon nga mas maayong susihon og maayo ang tanang mga babayeng boarders sa ilang dapit kay niadtong tungora daghan na man ang nanggawas sa mga balay ug nanguryoso.

Nianang tungora, namatikdan ang maong 18-anyos nga dalaga nga daling midagan palayo sa pundok hinungdan nga gitabangan kini og gukod sa mga tawo ug dihang naabtan nakit-an nga nag-bleeding kini nga naabot sa iyang paa.

Sa pakighinabi sa Banat News ni Rodrigo Ledesma, barangay tanod sa maong lugar  miingon kini nga base sa nakuha nilang impormasyon walay moangkon nga amahan sa gisabak sa maong dalaga mao nga iyaha kining nahimo. Usa ka naninda og karenderya sa lugar ang mibutyag nga kanunay mopalit og pagkaon kaniya ang maong dalaga ug gitug-anan siya niini sa dautang plano nga iyang buhaton sa anak ini og panganak niya niini.

“Akong giingnan nga dili na mahimo ang imong gibuhat kay molayas man gyud unta kuno siya human niya og labay sa bata,” matud pa sa maong tindera sa interbyu sa dyLA.

Si SPO3 Alexander Galleon sa Punta Princesa Police Station miingon nga ang imbestigador sa Women’s and Children’s Desk Officer mao nay naghupot karon sa maong kaso, gisusi na kung unsa nga mga kaso ang posibleng ipasaka batok sa maong babaye. (/EIM)(BANAT NEWS)