CEBU, Philippines - Duha ka mga patay’ng lawas sa babaye ang napalgang naglutaw-lutaw sa kadagatan sa lungsod sa Alegria nga paingon na sa pagkadugta.
Pasado alas-2 sa hapon niadtong Miyerkules napalgan sa usa ka mananagat nga si Andres Glinogo ang patay nga lawas sa usa ka babaye nga naglutaw upat ka kilometros gikan sa baybayon sa maong lungsod.
Gihulagway ang maong babaye nga nag-edad og 20 hangtod 25 anyos ang panuigon , 5’3 ang gitas-on, nagsuot og blue nga blouse, naka skinny jeans, pink ang kolor sa iyang bakus ug adunay silver nga singsing sa iyang tudlo.
Ang ikaduha nga patay nga lawas nakaplagan sa lain sab nga mananagat pasado alas-7 na sa gabii sa sama gihapon nga adlaw diha gihapon sa kadagatan sa maong lungsod.
Gihulagway nga anaa sa 5’2 ang gitas-on ang maong babaye, nga nagsuot na lang og underwear, wala na ang iyang kamot ug tiil ug sama sa nahaunang patay’ng babaye, nagsugod na kini og kadugta. Matud pa ni PO2 Lenard Cabahug sa Alegria Police Station nga gikahinabi sa Banat News, hangtod ning pagsuwat sa balita wala pay miduol sa ilang buhatan aron mokuha sa mga patay nga lawas.
Naglisod karon ang kapolisan pag-ila kanila tungod kay wala gyuy nakuha sa mga patay’ng lawas og mga timailhan sa ilang pagkatawo sama sa identification cards.
Nagtuo si Cabahug nga posibleng gikan sa lain nga lugar ang maong mga patay nga lawas ug gianod lang sa ilang lungsod.
Posible nga dili gyud ni taga diri sa Alegria kay wala man gyud nakaila sa ilaha, atbang ra man pud mi diri sa Negros. Lisod na gyud maila ang duha ka cadaver,†matud pa ni Cabahug.
Nagpakisayod na sab ang Alegria PNP sa kapulisan sa Negros ug silingan nila nga mga lungsod kung aduna ba’y missing persons nga natala sa ilang lugar. Sa pagkakaron ang duha ka patay nga lawas gipahiluna sa Saint Ann Funeral Home sa lungsod sa Badian.
Nanawagan ang kapulisan kung si kinsa kadtong nawad-an og babayeng sakop sa ilang pamilya nga mokontak lang sa ilang buhatan. (BANAT NEWS)