Mga alambre sa kuryente ug telepono nagbitay sa karsada

CEBU, Philippines - Dugay na nga nag-antos ang pipila ka mga molupyo sa sitio Teeners sa Barangay Tuyan, Naga tungod sa wala g’yud atimana nga mga alambre sa kuryente ug telepono nga nagyunyon na sa karsada.

Mga sakyanan nga moagi sa mao nga dapit mapugos g’yud sa pagpahinay tungod kay masangit kini sa kaubos na kaayo sa mga alambre nga nagbitay na sa karsada.

Si Esmael Rosal, usa sa mga nagpuyo sa mao nga dapit, niingon nga ila na nga gireklamo ang maong problema ngadto sa telecommunication companies ug sa Visayan Electric Company (VECO) apan wala gihapon kini tagda.

Matud pa nga daghan na nga mga motorista ang nangalamba tungod kay nasangit sa kutay sa linya sa kuryente ug linya sa mga telepono panahon sa gabii kay nagbabag kini sa tunga-tunga sa karsada. Sumala ni Rosal nga tungod sa ubay-ubay nga aksidente ug wala gihapon mahatagi og kasulbaran sa nahisgutang nga mga telecommunication companies ang reklamo, sila na lang mga molupyo ang nangita og paagi nga mapadaplin ang maong mga alambre.

Ilang gihulagway nga dilikado kaayo ang mao nga mga alambre nga adunay makuryentehan.

Ang uban sa mao nga mga alambre nangaputol ug anaa ra gibutang daplin sa karsada. (BANAT NEWS)