CEBU, Philippines - Ang mga kadete sa Philippine Military Academy (PMA) Class 2017 midasig sa mga Sugboanon nga motungha sa military academy aron sila mahimong umaabot nga opisyal sa armado’ng kusog sa nasud.
Dul-an sa 200 ka kadete sa PMA ang misuroy sa lainlaing kampo sa kapolisan ug militar dinhi sa Sugbo isip kabahin sa “Southern Cruise†nga sagad himoon sa mga kadete sa PMA.
Ang mga second year PMA cadets miingon nga ang kakabos dili angay’ng himoon nga babag sa pangandoy pagsulod sa military academy kay daghan kanila nga kadete gikan lang og mga pobre nga pamilya.
Nahimuot kaayo ang katawhan nga misaksi sa mga PMA cadets nga mipahigayon og Silent Drill Exhibition, ilabi na diha’ng gipang-itsa nila ang ilang mga pusil samtang magmartsa ug saw-on kini sa mga kadete nga anaa sa ilang likod.
Ang pagbisita sa mga PMA cadets sa lainlaing dapit gitumong aron ma-expose sila sa nagkalain-laing AFP units, pakig-alayon sa mga nagkadaiyang stake holders ug lakip na ang pag-umol sa mga kadete aron mahimong responsable’ng lider sa komunidad.
Gibisitahan na sa mga cadets ang Palawan, Davao, Zamboanga, ug karong adlawa moadto na sila sa Corrigidor.
Dunay mga Sugbuanon nga nalakip sa maong PMA batch ug misulod sila sa academy aron makaserbisyo sa nasud.
Matud ni Cadet Charade Catipay, taga Dalahikan, Samboan nga dili mahinungdanon kun babaye o lalaki ang kadete kay patas man ang pagtagad kanila sa academy.
Kadtong nag-edad na og 17 ngadto sa 21 ug walay dautang rekords mahimong madawat isip kadete sa PMA. Kun mogradwar na ang kadete sa PMA magdala na sila og ranggo nga teniente. (BANAT NEWS)