CEBU, Philippines - Gihatagan og pagtugot sa konseho sa Talisay si Mayor Johnny De Los Reyes nga mogahin og salapi isip counterpart sa budget sa Department of Agriculture (DA) alang sa pagmugna ug pagpalambo sa mga farm to market roads.
Si Konsehal Socrates Fernandez, chairman sa committee on public works and infrastructure, nagkanayon nga ang farm to market road project mahinungdanon kaayo nga hatagan og prayoridad.
Ang maong proyekto daku og tabang sa mga mag-uuma sa bukirang barangay nga mapasayon ra ang pagtumod sa ilang produkto ngadto sa kamerkadohan.
Gitugotan sa Talisay City Council si Mayor De los Reyes sa paggama og Memorandum of Agreement (MOA) tali sa DA.
Dili pa lang dugay ang konseho mipasar og resolusyon nga nag-uyon sa paggahin og pundo sa siyudad isip counterpart sa budget sa DA alang sa mao’ng proyekto. Ang Department of Agriculture Field Office-VII maoy midawat sa P2,250,000 nga budget gikan sa nasudnong kagamhanan. Ang kagamhanan sa Talisay nga maoy beneficiary sa project kinahanglang mogahin og 10 porsiyento o P250,000 isip iyang counterpart sa budget sa DA. (BANAT NEWS)