CEBU, Philippines - Maayong pagkagisi sa ulo sa usa ka lalaki human kini gibunalan og botelya tungod kay gikasuyaan sa ka maayo moikid sa pagsayaw atol sa bayle sa Sitio Riverside, Barangay Canduman, dakbayan sa Mandaue alas-12 pasado ang takna sa tungang gabii niadtong Domingo.
Ang biktima mao si Gerald Cortes, 22, nagpuyo sa maong dapit samtang wala madakpi ang nagbunal kaniya og botelya nga daling mikaratil og dagan.
Si PO3 Arnold Villacampo sa kapolisan sa Presinto 6 sa Mandaue City Police Office (MCPO) miingon nga nagsaulog sa tinuig nga piyesta sa ilang kapilya ang maong dapit nga maoy hinungdan nga adunay gipasiugdahang disco nga gitapokan sa daghang mga batan-ong lalaki ug babaye.
Matud pa ni PO3 Villacampo nga nalingaw kaayo ang mga tawo nga mitambong sa gipasiugdahang disco apan kalit lang napusgay ang botelya ug nakita na lang nga nagkadugo na ang biktima.
Dugang pa ni PO3 Villacampo nga ang biktima gituohang nasuyaan lamang kay maayo man kining mosayaw og disco.
Ang biktima dali nga gihatod sa Mandaue City Hospital samtang nagpadayon ang imbestigasyon sa maong kaso. (BANAT NEWS)