CEBU, Philippines - Usa ka mag-uuma ang naghikog sa balay sa iyang igsuon didto sa barangay Pasol, Alcoy kaniadtong Biyernes sa buntag.
Ang nagpakamatay giila nga si Regino De Leon, 59, ug nagpuyo gihapon sa nahisgutang lugar.
Base sa imbestigasyon sa kapolisan, ang igsuon ni Regino nga si Dominica De Leon maoy nakakita nga ang iyang igsuon nagbitay na sulod sa iyang panimalay.
Si PO3 Emilio Carunggay miingon nga si Dominica bag-o lang nauli gikan sa iyang umahan ug nakabantay kini nga sirado ang iyang balay.
Iyang gilili sa bentana ug mao na lay iyang nakit-an nga nagbitay na ang iyang igsuon nga si Regino nga adunay pisi nga gihigot sa iyang liog.
Gisuwayan unta pagdala si Regino sa Alcoy Rural Health Unit sa pagtuo nga matabang pa siya apan gideklarar na nga patay na ang mag-uuma.
Si Nita nga asawa sa naghikog miingon nga nakasinati og tumang kaguol ang iyang bana sa wala niya mahibaw-i nga hinungdan apan matud niya nga si Regino nakasinati og nervous breakdown. (BANAT NEWS)