CEBU, Philippines - Inay makakuwarta gikan sa negosyante’g prutas nga iyang gitulis, nadakpan ug nakulatahan pa g’yud hinuon sa mga bugoy ang suspetsado nga tulisan human misukol kaniya ang tawo nga iya unta nga tulison.
Wala magsilbi ang 45 kalibre nga pistola ni Johny Gonzales, 24, kay gibunalan siya’g tubo nga puthaw ni Angelo Danao, usa ka molupyo sa Barangay Sabang, dakbayan sa Danao.
Matud ni PO2 Ronald Gomez sa Danao City Police Station nga si Gonzales, taga dalan Almendras, Poblacion, Danao mitulis unta sa biktima samtang ang gimaneho nga multicab ni Danao naghunong sa Barangay Sabang. Kalit nga misapigad ni Danao ang usa ka motorsiklo nga nag-angkas si Gonzales ug mideklarar nga tulis, dayon gidemanda ang iyang halin sa pagpamaligya og prutas kaniadtong Biyernes sa gabii.
Dihang misukol si Danao, ang mga standby abtik kaayo nga miduol ug gitabangan nila’g kulata ang tulisan. Ang kauban ni Gonzales nga naila lang sa angga nga Mando abtik kaayo nga nakapadagan sa motorsiklo ug miikyas pagkakita nga ang iyang kauban gikulata na sa mga bugoy.
Matud pa ni PO2 Gomez ang dinakpan nagtingkagol na sa bilanggoan ug kay nakuhaan man kini’g armas nga may upat ka bala hayan makapasamot kini sa kabug-at sa iyang kaso. (Romeo T. Limpangog, Athena Bea T. Del Carmen ug Judie Mar N. Dinopol, CNU Interns/RUB)(BANAT NEWS)