CEBU, Philippines - Gireklamo ang Cebu City Youth Development Commission (CCYDC) human misumiter og apela ang duha sa mga finalists sa The Outstanding Cebu City Youth Leaders (TOCCYL) ug mipasangil nga way klaro ang pagpili sa mga nahatagan og pasidungog.
Ang gireklamo mao si Claro Roy Labra, CCYDC executive director human gipasanginlang wa niini gisunod ang tamdanan sa pagpili sa maong indigay.
Si Greggy Senados, mipadangat og suwat ngadto sa buhatan ni Konsehal Ma. Nida Cabrera kalabot sa maong iregularidad.
Si Senados usa sa mga finalists sa TOCCYL sa Young Professional Category ug mipasangil nga dili ang mga hurado ang mismong nagkwenta sa mga grado sa mga finalists ug mipasangil nga sila si Labra ug mga staff members lamang niini ang mihimo niini.
Lain usab nga reklamo mao ang wala pagkaapil sa listahan sa mga finalists sa pangalan ni Rafael Enriquez ug gani si Mayor Michael Rama pa maoy mitawag kaniya aron pasak-on sa entablado.
Daghang gireklamo si Senados batok sa sistemang gipatuman sa buhatan ni Labra, lakip sa gisaway mao ang wa pagpahigayon og screening sa mga misalmot, ang pagtugot nga makasulod sa ilang buhatan ang entrante samtang gihimo ang tabulation, ang wala paghatag sa resulta sa maong kompetisyon ngadto sa mga finalists, ang wala paghatag sa mga polo shirts ug cash prizes nga giingong gisaad sa maong kompetisyon, ug ang wa pagpublikar sa maong kalihokan. (Jo-Anne Archival, CNU Comm Intern) (BANAT NEWS)