CEBU, Philippines - Si Cebu City Councilor Dave Tumulak miklaro nga dili siya moluwat og affidavit mahitungod sa iyang nakita sa video footage nga nakuha sa Close Circuit Television (CCTV) camera sa pagkahanaw sa mga kahoy sa Sergio Osmeña Road. Gipasabot ni Tumulak nga dili siya ang angayang kuhaan og affidavit kun dili ang CCTV operator aron sa pag-authenticate sa video.
Matud ni Tumulak nga dili lang siya ang nakakita sa video footage kun dili lakip na ang mga personnel sa Department of Environment and Natural Resources (DENR) nga angayan usab nga moluwat og affidavit. Si Tumulak miingon nga dili maayo’ng langay-langayon ang kaso ug dili angay diktaran ang korte sa ilang desisyon.
Apan ang DENR sa ilang bahin, miingon nga dili paglangay-langay ang ilang gihimo sa kaso ug gani nangayo na sila og tabang sa National Bureau of Investigation (NBI) aron mapadali ang pagtigum sa ebidensya.
Matud sa DENR nga wala sila mamugos ni Tumulak kun mobalibad kini sa ilang hangyo. (BANAT NEWS)