CEBU, Philippines - Si Police Regional Office (PRO)-7 Director Danilo Constantino mibarog g’yud nga ang mga security guards kinahanglang adunay armas aron sa pagpanalipod sa mga kinabuhi ug butang nga ilang gibantayan.
Ang pamahayag ni Constantino maoy iyang reaksyon sa sugyot nga did-an na lang ang mga gwardya nga makadala’g armas aron paglikay sa samang hitabo didto sa lungsod sa Daanbantayan niadtong Sabado.
Si Vice Governor Agnes Magpale, pangulo sa Committee on Tourism, nakadawat og sugyot nga angayan nga usbon ang pamaagi ug tugtan lang ang mga gwardya nga nagbantay sa mga resort pagdala og mga non-fatal weapons.
Apan si Constantino pabor gihapon nga aduna’y armas ang mga gwardiya samtang sila nag-duty.
“Ideal na dapat meron pa rin (firearm) pero depende rin sa owner ng resort kay sila ‘yung kliyente,†matud ni Constantino kinsa miklaro usab nga kinahanglan nga naka-uniporme ang mga gwardya samtang armado.
Si PO3 Alfredo Mandal, imbestigador sa Daanbantayan Police Station, miingon nga wala nag-uniporme si Melchor Alciso Jr., 42, sa dihang iya nga gipusil patay ang British national nga si Anthony Gilchrist.
Ang langyaw, 34, maoy tag-iya sa Fish Buddies Dive Shop Resort nga maoy gibantayan sa gwardiya.
Si May Villagonzalo, chief sa Rolling Hills funeral homes mitug-an nga ang lawas ni Gilchrist gi-cremate na kaniadtong Martes ug ang abo dad-on na balik sa Britanya. (BANAT NEWS)