CEBU, Philippines - Nagkinahanglan og dugang mga korte ang Palace of Justice sa dakbayan sa Toledo alang sa dinaliang pagdungog sa mga kaso nga gisang-at sa maong buhatan.
Nasayran nga aduna lamang duha ka korte ang Palace of Justice sa siyudad sa Toledo.
Matud ni Presiding Judge Hermes Montero sa Regional Trial Court Branch 59 nga nahinabi sa Banat News nga angayang dugangan og duha ka korte ang palasyo sa hustisya sa Toledo aron daling mahusay ang mga nagtipun-og nga mga kaso karon. Sumala pa ni Montero dili momenos 800 ka mga kaso ang nasang-at sa iyang buhatan nga iyang giatiman.
Samtang sa buhatan ni Presiding Judge Ruben Altubar sa Regional Trial Court Branch 29 gikompirmar ni Atty. Ingrid Sagmon, clerk of court, nga sukad sa buwan sa Marso 2014 adunay 1,098 ka mga kaso ang nasang-at sa ilang buhatan.
Ang mga kaso gilangkuban sa mga criminal cases, civil case, special proceedings ug uban pa.
Ang mga kaso nga gikan sa lungsod sa Aloguinsan, Pinamungajan, Toledo City, Balamban, Asturias, Tuburan ug Tabuelan ang nakasang-at sa Palace of Justice sa Toledo City. (BANAT NEWS)