CEBU, Philippines - Ang gideklarar sa hukmanan nga maoy mananaog nga kapitan sa Barangay Pasil, dakbayan sa Sugbo miadto sa opisina ni Mayor Michael Rama kagahapon aron makapanumpa siya sa iyang katungdanan apan mibalibad ang mayor. Si Francisco De Gracia Jr. nagbitbit sa iyang mga dukomento nga nagpakita nga siya milabaw og 218 botos batok sa iyang kaatbang nga si Julius Guioguio.
Human sa eskutinyo atol sa eleksyon sa barangay kaniadtong Oktobre, ang mga sakop sa Barangay Board of Canvassers mideklarar nga si Guiguio maoy midaog pinaagi sa labaw nga 150 botos batok ni De Gracia.
Si De Gracia miawhag nga iphon pag-usab ang mga balota didto sa hukmanan. Wala makadawat si Guioguio nga si De Gracia maoy gideklarar nga mananaog pagka kapitan mao nga miapelar siya sa disisyon.
Apan si De Gracia mihangyo ni Judge Tecson nga tugotan siya nga makalingkod pagka kapitan mentras wala pa ang hukom sa pag-apelar ni Guioguio ug gitugotan siya sa huwes.
Si Mayor Rama wala mopapanumpa ni De Gracia kagahapon bisan og iya kini nga alyado sa politika tungod kay wala kini makapresentar og Writ of Execution nga gikan sa huwes. Kini maoy nakaaghat ni De Gracia nga didto na lang nanumpa atubangan ni Atty. Rilven Christian Virtudazo nga maoy iyang abogado. Ang pagpanumpa didto himoa sa opisina sa secretary ni Mayor Rama.
Ang mga dumadapig ni De Gracia miuban kaniya pag-adto sa City Hall kagahapon ug mahinangpon kaayo nga nakapanumpa na ang ilang kapitan.
Si De Gracia maoy gisuportahan sa Team Rama samtang si Guioguio tua usab moalalay sa Bando Osmeña Pundok-Kauswagan (BOPK). Mipasalig si De Gracia nga paninguhaon niya nga masumpo ang illegal nga kalihukan sa Pasil, sama sa pagpamaligya og shabu ug ang gidili nga mga sugal. (BANAT NEWS)