Malinawon ang Semana Santa — PRO7

CEBU, Philippines - Malinawon ang pag-obserbar sa Semana Santa sa Central Visayas lakip sa kasaulogan sa Pagkabanhaw lukop sa rehiyon.

Si Supt. Renato Dugan ang Public Information Officer sa Police Regional Office (PRO) 7 miingon nga way dagkong krimen ang natala sa rehiyon nga nakabalda sa pagtimaan sa Semana Santa. Dugang pa ni Dugan nga bisan pa man dunay mga krimen sama sa pagpatay, lungkab ug pagpanguot atol sa maong semana gihulagway niyang normal lang kini.

Wala say mga panghitabo sa mga simbahan ug sa mga lugar diin tapokanan og tawo tungod sa mga relihiyosong mga kalihokan.  Apan didto sa Minglanilla, duha ka mga lalaki ang gitabangan og kulata human gipasanginlang nanguot sa mga misaksi sa Sugat sa Kabanhawan niadtong Domingo sa kaadlawon.

Samtang sa Isla sa Bantayan usa ka grupo sa mga batan-on nga gikan sa Pasil ang nasikop tungod kay gipasanginlan sila nga nanguot sa mga turista nga mibakasyon sa maong lugar atol sa Semana Santa.

Ang maong mga batan-on gikatakdang pasakaan og kaso sa hukmanan sanglit ang mga turista nangusog gyud nga mapasakaan sila og kaso. (BANAT NEWS)