Gidakop ang duha ka nanghulga

CEBU, Philippines - Gidakop sa kapolisan ang duha ka lalaki nga nanghulga nga patyon nila ang ilang mga kontra.

Ang nasikop naila nga si Yuri Abella, 39, molupyo sa Punta Princesa ug si Winston Erro, 26, taga Sitio Banawa, Guadalupe, pulos sakop sa dakbayan sa Sugbo. Nalambigit sila sa buwag nga pagpanghulga.

Ang report nagkanayon nga si Ma. Luisa Romero, 27, molupyo sa Barangay Punta Princesa maoy mireklamo batok ni Abella.

Base sa imbestigasyon sa kapolisan nga si Abella mition og armas ug mihulga ni Romero ug sa iyang anak nga iyang patyon.

Matud pa nga giingnan ni Abella ang inahan ug anak nga “Ihulog ta mo sa bridge, una pa ka mamatay sa Ginoo.” Si Abella gidakop sa miresponde nga kapolisan.

Samtang si Erro nga taga Golden Ville, Sitio Banawa gidakop diha nga gireklamo ni Jacqueline Erro, 36, molupyo gihapon sa Sitio Banawa. Wala itataw sa police report kun ngano nga managsama sila og bansagon.

Si Jacqueline mireklamo sa kapolisan nga gihapak sa suspek ang iyang baba ug giingnan nga “kun mosumbong mo sa mga polis, kun mapriso ko ug makagawas, pamatyon ta mo.” Wala mahadlok sa bahad, misumbong si Jacqueline sa kapolisan mao nga gidakop dayon ang suspek. (BANAT NEWS)