CEBU, Philippines - Tulo ka tawo ang patay ug usa ang angol sa managlahing aksidente sa kadalanan sa lungsod sa Liloan, Sibonga, ug Barili.
Sa lungsod sa Liloan, gideklarar nga patay si Criselda, 41, taga Barangay Tayud human ang gisakyan nilang motorsiklo sa iyang bana nadasmagan og awto sa national road sa Bahak, Barangay Poblacion pasado alas 10:00 sa buntag adtong Miyerkules.
Ang biktima angkas sa motor sa bana nga si Jhony Baguio dihang mikalit og U-turn ang usa ka Kia Sportage (YCR 354) nga gimaneho ni Ildefonso Pilapil nga miresulta sa aksidente.
Ang duha ka mga biktima daling gidala sa Velez Hospital sa Cebu City apan nakabsan gyud sa iyang kinabuhi ang ginang.
Sa lungsod sa Sibonga, laing drayber sa motorsiklo ang patay human madasmag ang gimaneho niini nga motorsiklo sa naka-parking nga ten-wheeler truck sa national highway sa Barangay Abugon mga alas 2:00 sa buntag adtong Huwebes.
Si Rolando Tampos, 48, taga Barangay Candaguit paingon sa Carcar City dihang mibangga likod nga bahin sa Fuso truck (GXN 907) nga gimaneho ni Velardo Corsama, 34. Ang truck naaberya niadtong tungora apan gipasiga ang “hazard lights†niini apan wa makabantay niini ang biktima. Dali kining gidala sa Carcar District Hospital apan gideklarar kini nga dead on arrival. Misuway sa pag-ikyas si Corsama apan nasikop kini sa Traffic Management Unit sa Mandaue City sa tabang sa usa ka witness nga si Jerry Caballes.
Sa Barili, usa ka Olympio Montemayor Bayogo Jr., 36, nga nagmaneho og motor ang nisaliring dihang nakadasmag og giparking nga trisikad diha sa sitio Cantabo, Barangay Gunting alas 6:45 sa buntag sa miaging adlaw.
Dali kining gidala sa Barili District Hospital apan gideklarar kini nga dead on arrival. (BANAT NEWS)