CEBU, Philippines - Patay nang napalgan ang usa ka negosyante og utanon nga may samad pinusilan sa iyang tiyan pipila ka metros gikan sa iyang balay sa sitio Libo, barangay Lepanto sa lungsod sa Alegria pasado alas 7:00 sa buntag niadtong Biyernes Santo.
Ang biktima naila nga si Paterno Navarro, 45, molupyo sa nahisgutan nga lugar. Samtang wa pay ideya ang kapolisan kun kinsa ang mamumuno niini.
Base sa imbestigasyon sa kapolisan nga ang biktima napalgan sa iyang mga silingan kinsa maoy mitawag og panabang sa kapolisan. Sa pagsusi sa kapolisan sa lawas sa biktima, may samad pinusilan kini sa iyang tiyan.
Matud pa nga gikan pa nitumod sa Carbon Market sa dakbayan sa Sugbo og utanon ang biktima ug giingong nahalinan kini og P40-50 mil.
Gisulayan pa og dala sa Badian RHU Clinic apan patay na kini matud pa ni Dr. Urduja Espiritu. Ang kapolisan sa Alegria padayon pang nag-imbistigar sa motibo sa pagpusil sa biktima ug kun kinsa ang mipusil kaniya.
Samtang usa ka Jessie Sollano, residente a sitio St., Joseph sa barangay Marigondon ang nakit-an nga naligo sa iyang kaugaligong dugo diha sa Sitio Kadulang sa nahisgutang barangay nga gidudahang nabiktima sa pagpamusil.
Base sa imbestigasyon nga niadtong Sabado sa kaadlawon ang mga barangay tanod nakadungog og buto sa maong dapit.
Apan nianang kaadlawon duna nay mitawag sa barangay hall nga dunay nakaplagang tawo sa lugar. Matud pa sa mga silingan sa biktima nga usa kini ka notadong kawatan ug kataposan kining nakit-an niadtong Biyernes sa gabii nga dunay kuyog nga duha ka wa mailhing tawo. (BANAT NEWS)