IEC preparation gihangop sa Vatican

CEBU, Philippines -  Malipayong gipahibalo  ni Cebu Archbishop Jose Palma nga aprobado na sa Vatican ang   ilang gihimong preparasyon  alang sa International Eucharistic Congress (IEC) nga ipahigayon karong 2016  dinhi sa dakbayan sa Sugbo.

Matud ni Palma nga dako kaayo ang kalipay sa pontifical committee nga gilangkuban sa mga cardinal ug bishops tungod kay ang mga plano nasubay sa ilang tinguha. Dugang ni Palma nga importante nilang tukuron isip kabahin sa pagpangandam sa IEC mao ang pavilion nga itukod sa San Carlos Seminary.

Malaumon ang Arsobispo nga inubanan sa mga pag-ampo magmalampuson ang plano kini aron ilang mapakita ug mapaambit sa katawhan kun unsa ka mahinungdanon ang pagtuo. Si Palma miingon nga tataw ug klaro ang separation sa church ug state hinungdan nga wala sila nangayo og donasyon ug suporta gikan sa nasudnong kagamhanan. Mapasalamaton  hinoon ang simbahan gumikan sa suporta nga gihatag sa mga Sugbuanon sama sa pag-aprove sa mga lisensiya ug uban pa nilang gikinahanglan. Gilauman nga sa International Eucharistic Congress moabot si Pope Francis ug gipaabot nga liboan ka mga tawo ang mosalmot niini.  (BANAT NEWS)