70 ka tawo nakapahimulos sa CHAMP

CEBU, Philippines - Mikabat sa 70 ka tawo ang nakabenepisyo sa City Hospital Assistance and Medicine Program (CHAMP) ug burial assistance kagahapon gikan sa kagamhanan sa dakbayan sa Sugbo.

Si Mayor Michael Rama maoy mitunol sa mga tseke nga tag-P5,000 ngadto sa 45 ka claimant sa medical assistance ug 25 usab ang nakadawat og ‘tag-P10,000 nga burial assistance kinsa  mga paryente sa nangamatay.

Ang siyudad nanghatag usab kini og libreng lungon niadtong mga pobre g’yud nga pamilya gawas sa cash nga burial assistance.

Matud ni Ruben Baculi, hepe sa Burial Assistance Office nga kini usa ka prebilihiyo ngadto sa mga lumulupyo sa siyudad sa Sugbo nga nanginahanglan og tabang kun aduna ma’y mga panghitabo sama sa kamatayon ug pagpa-admit sa tambalanan.

Samtang giklaro usab ni Henry Sanchez, hepe sa CHAMP, nga ang mga claimant nga nakadawat ug medical assistance kagahapon, mao ang mga aplikante nga wala nakadawat og cash assistance niadtong panahon sa ilang pagka-admit sa tambalanan.

Ang makabenepisyo sa medical assistance makadawat og P35,000 nga gilangkuban sa P25 mil nga hospitalization assistance, P5 mil alang sa tambal ug laing P5 mil alang sa laboratory ug uban pang procedures.

Matag tuig ang siyudad migahin og P30 milyones nga pundo alang sa Burial assistance walay labot sa libreng lungon, P100 milyones sa hospitalization ug P20 milyones sa medicine assistance.

Ang papeles nga gikinahanglan sa buot nga makabenepisyo sa hospitalization program mao ang COMELEC certification, barangay certificate pagpamatuod kun nagpuyo ba  ang aplikante sa dakbayan sa Sugbo, medical abstract, medical certificate, hospital bill ug Official Receipt.

Samtang sa burial assistance ang mga rekisitos mao ang voters certificate, barangay clearance ug death certificate sa namatay ug birth certificate sa claimant aron mahibaw-an ang relasyon niini sa namatay. (Jo-Anne Archival, CNU Intern/BDB)(BANAT NEWS)