GRO sa Lapu-Lapu gibantayan g’yud

CEBU, Philippines - Gimandoan ni Lapu-Lapu City Mayor Paz Radaza ang City Health Department  pag-monitor sa mga Guest Relations Officers (GRO) ug mga trabahante sa bars ug night clubs sa dakbayan.

Matud ni Mayor Radaza nga nagkadaghan ang mga langyaw nga miabot sa dakbayan sa Lapu-Lapu ug usa sa maghatag og lingaw kanila mao ang kahilayan matag gabii hinungdan nga ipaubos g’yud sa hygiene ang kababayen-an nga nagtrabaho sa mao nga balay-patigayon.

Si Dr. Rodolfo Berame mipadayag nga kanunay nilang gi-monitor ang mga GRO diin matag semana kini nila’ng gihimoan og hygiene sa ilang buhatan.

Ang mga sakop sa "Local Aids Council" nga gilangkoban sa mga representante gikan sa DepEd, kapolisan, kabomberohan, City Legal Office ug Mayor’s Office mohimo’g pakisusi matag duha ka bulan sa mga balay-patigayon kun wala bay menor de edad nga nagtrabaho.

Sutaon sa grupo kun ang mga babaye nakapa-hygiene ba sulod sa maong semana ug kun kompleto ba sa gikinahanglang permit ang maong balay-patigayon.

Kadtong masakpan nga wala makatuman sa gilatid nga lagda suspensohon ang operasyon ug kun masundan pa kini og lain nga kalapasan mahimo na kini nga patak-opan.

Naghatag usab sila og mga condoms nga libre kun adunay manginahanglan.

Si Dr. Berame hinoon miingon nga wala pa sila’y nahibaw-an nga natakboyan og sexually-transmitted diseases ug Human-Immunodeficiency Virus (HIV) sa dakbayan sa Lapu-Lapu.   (BANAT NEWS)