Kanhi asset na buy-bust sa RAIDSOTG

CEBU, Philippines - Nasikop sa mga sakop sa Regional Anti-Illegal Drugs Special Operations Task Group 7 ang usa ka kanhi agent sa Military Intelligence Group sa buy-bust operation nga gihimo pasado alas 7:00 kagahapon sa buntag sa Punta Engaño sa dakbayan sa Sugbo.

Ang nasikop naila nga si Tereso Daño, 33, molupyo sa nahisgutan nga lugar.

Si SPO4 Honorato Tano sa RAIDSOTG nga nahinabi sa mga tigbalita miingon nga ang maong suspetsado gipaubos sa surveillance sulod sa usa ka semana tungod sa taho nga ilang nadawat nga namaligya kini og shabu. Nasuta nga positibo ang maong taho mipahigayon gilayon sila og buy-bust operation. Matud pa nga si Daño mismo ang giingong mibaligya ngadto sa usa ka pulis sa usa ka bulto nga shabu nga nagkantidad og P25 mil.

Dihang nahuman ang ilang transaksyon gisikop kini sa kapolisan ug wa na mosukol pagdakop kaniya.

Narekober sab gikan sa suspek ang laing tulo ka bulto nga shabu ug ang P400 nga gituohang halin niini sa pagbaligya og shabu.

Si Daño nga nahinabi sa mga tigbalita miangkon nga nagbaligya gyud siya og shabu nga maoy iyang gisuporta sa iyang pamilya.

Gikatahong ang supply ni Daño kinuha gikan sa dakbayan sa Mandaue ug nag-supply usab siya niini sa Bohol. (BANAT NEWS)